بعد ما قررنا نمشي بالسيارة تم تجهيز الأغراض شيكت البرادو وزبطنا كل شي استعدادا للسفر وليلة السفر صارت سالفة يمكن يجي يوم ونقوله بس ماهو وقته الحين ويوم السبت صباحا توكلنا على الله ومسكنا الخط بأتجاه مكة بس طبعا الطائف اول
هذا الشعب اللي مخاوينا ريما ومعن أو سلفر وعزام اللي لاهي مع القامبوي وزياد راكب في المرتبة الأخيرة عشان كذا ماهو باين
واخذنا الحط تمشي كل ماجاز لنا شي وقفنا شوي نتفرج وهذي صورة بحيرة صغيرة ومستغرب وشلون هي مقاومة الحر والشمس إلى الحين
وهذه شاحنة تحمل ما لا يقل عن خمس وعشرين سيارة مرة وحدة بس كلهن سكراب ومصفطات تقل شمغ
وبعد ما قطعنا يمكن 700 كيلو من الرياض حسيت ان عزم السيارة دحدرواهدي على جنب وطفت السيارة وطفا البرادو افا وشو ذا اشتغل تكفى لا توهقنا معنا شعب لا تفشلنا تكفى اشتغل ما هقيته منك ارجوك لو سمحت يا الطيب بس مافيه فايدة انزل وافتح الكبوت واشيك كل شي طبيعي جدا وكل شي مشبك ومزبوط بس برضة ما هو راضي
دقيت على 112 حسب نصيحة ام لينا الله يذكرة بالخير ويسهل له اموره بدراسته وبعد عشر دقايق ارسلوا لي سطحة حمراء وسيارة صغيرة شالتنا لأقرب منطقة وهي الحاوية قبل الطايف بشوي ويوم وصلنا دورنا احد يعرف للسيارة محدش وحسيت اني تورطت حنا الحين أخر العصر وين بلقى ورشة محترفة وربك ما يضيع احد لقينا هاك الكشميري او باكستاني قال تعال اشوف بس ماهو اكيد اعرف له قلت يالله ما فيه خيار ثاني وبدأ يجرب واتضح ان طرمبة البنزين للتانكي الأحتياطي خربانة وعبينا تانكي البنزين الأساسي واشتغلت السيارة الحمدلله بدون اي تعقيدات احمدك يا رب
وهذولا الشعب الكريم راكبين السيارة الصغيرة اللي شالتنا من الطريق ومبسوطين لأنهم يلعبون به على كيفهم
وبعد ما زانت الأمور وتغدينا عقب هالسالفة وشبعت كتبت هالقصيدة بالبرادو
يابرادو ماهقيتك وهم ما هقوك
يابرادو يا الأشهب هذا بلا ابوك
راعين العيون الحمر نحتوك
وما دري وراهم خربوك ومن عيني طيحوك
وعلى سطحة حمراء حملوك
لولا الله ثم الكشميري ما صلحوك
اجل لو انك لكزس ما تركوك
الحمد لله ربي ورب اللي صنعوك
انت الحين بخير وعساك تسلم للي شروك
البقية تتبع لاحقا في الأعلى
