Abu Ziad

لاحظت مؤخرا إزدياد التعليقات المزيفة التي تحمل دعايات لمواقع غير محترمة أو تحمل عبارات غير مقبولة وجميعها باللغة الأنجليزية

حيث يصلني يوميا أكثر من 100 رسالة من هذا النوع لذلك تم إيقاف التعليقات المباشرة وكل التعليقات يتم مراجعتها أولا ثم يتم وضعها في الموقع ونعتذر إذا تم نشر تعليقات من هذا النوع بدون قصد

حصل لي فرصة الأسبوع الماضي أن أزور منطقة الحدود الشمالية وهي متاخمة للحدود مع العراق والكويت تلبية لدعوة من جهة رسمية بخصوص تنفيذ مشروع خاص بالشركة في تلك المنطقة وأهم شيء يمكن أذكره هو كرم وطيبة أهل المنطقة وعلى رأسهم أمير منطقة الحدود الشمالية الأمير عبدالله بن عبدالعزيز بن مساعد اللي حصل لي الشرف وقابلته في إجتماع خاص بالمشروع ولا أبغى أمدح فيه لأني ما أعرف أمدح وفيه غيري من يقدر يمدح أحسن مني بس أكثر شي لفت أنتباهي هو حرصه على مصالح المواطنين وبساطة الأمارة والأستقبال للناس وبدون حراسات مشددة وسهولة التعامل والتواضع والغريب وحنا نتكلم عن المشروع والخطة للتنفيذ قال يا وليدي أنت من القصيم قلت إيه مع أني حاولت ما أبين اللهجة وبعد شوي قال أنت من بريدة رضي الله عنها قلت صدقت طبعا كان يقول كذا وهو يمزح المهم من الأشياء اللي إستغربت منها أنه كان يقول أنتم إبدو بالمشروع وخلوا الباقي علي وانا كل يوم عقب العصر أمر عليهم وأتابع الشغل لكم لين يخلص أنا حسبته يمزح بس بعدين عرفت أنه جاد وأنه فعلا يتابع المشاريع في المنطقة بعد العصر ويمر على المواقع ويحرص المقاولين وأحيانا يدفع مستخلصات المقاولين من جيبه الخاص حتى ينتهي المشروع بعدين يسدونه وبرضه دريت أنه كان أمير لبريدة قبل أكثر من خمسين سنة

ومن الحاجات الللي لاحظته أن الناس بهالديرة يستخدمون الجيل الثالث من الجوال من أول يوم دخلت الخدمة وحنا بالرياض ما جبنا خبره بس ما أدري وش تفسيره هذي

وحصل لي أن أنتقلت من مدينة عرعر للقريات بالسيارة وكان معي سواق شايب عنزي إسمه أبوسعود بس رجال بكل ما تعنيه الكلمة ويوم عرف أني شمري قام ما شاء الله عليه بس أنواع السواليف عن شمر وشيوخه وقصتهم مع بن عريعر بالأحساء وغيرهن واجد من السواليف الله يذكره بالخير إلى درجة أنه بعد ما وصلت الرياض إتصل يسلم ويتطمن

الحقيقة جازت لي الديرة من أهله ووسع صدورهم وبساطتهم وحسن نواياهم والله أعلم يمكن يجي يوم ونسنترهناك 

أحسن شي الواحد يمكن يسويه في حياته أنه يكون عنده مهنة وصنعة في يده يستخدمها وقت الحاجة أو إذا ضامته الدنيا وانصكت كل البيبان يعني مثلا المفروض أن الواحد يعرف يشتغل قصاب مثلا عشان الأعياد أو في المستقبل إذا دعت الحاجة الله لا يقدر أو نجار أو حداد أو سباك أو أي مهنة ثانية تكون بيده إحتياط عن تقلبات الزمان  والمفروض ان الواحد ما يعتمد على شهادته صح الحين الشهادة أهم شي وان كل ما كان فيه حروف وكلمات قبل إسمك كل ما كان أسمك له معنى ومن غير هالحروف يمكن تعتبر في نظر الناس نكرة وممنوع من الصرف مثل أسمي لأن أسمي أعجمي فبالتالي ما يعرف وشلون يعرب المهم يمكن يجي يوم لا لا لا قدر الله أن كل الحروف هذي اللي قبل إسمك يمكن تطيح أو يمكن تضيع الشهادة ولا تقدر تطلع بدل فاقد كل هذا يمكن والله أعلم القصد تصير عندك حرفه توقا به من حر الزمان

المهم محاكيكم قرر يتعلم مهنة بس تكون فيها شوية إبداع طبعا رسام لا لا شاعر أكيد لا قررت أتعلم أصير حلاق أيوه حلاق بس حلاق فنان وبعد ما قررت جربت على نفسي بالبيت لأن الرواد دايما يضحون بانفسهم ولكن الحمدلله تمت التجربة على خير وقررت أوسع دائرة الأختبارات والتجارب لتضم العائلة الصغيرة فكان المتبرع الأول هو زياد وقعدت أحورف براسه يمكن ساعة يالله خلصت وكل ما قلت خلصت قال يبه لا شف هذا طويل شوي لا شف هذا صار أقصر من هذا حتي بغيت أحلقة صفر على الموس المهم حتى أقنعته أني حلقته زين ويالله أقتنع وبعده جاء دور عزام طبعا أنا تعلمت الحين مهارات أكثر من أول وصرت أسوي بعض الحركات بسرعة شوي يعني صرت أشبه الحلاقين الصدقيين يعني ما تقدر تفرق بين حلاقتي وحلاقة التركي اللي عند بيتكم وقدرت أخلص عزام في نص ساعة بس طبعا ما كان مقتنع كثير بس زحلقناه يوم جا الدور على معن بس عيت أمه تخاف أقطع أذنه المهم بطلنا عنه وتقدمت متبرعه وهي ريما وطلبت أني أحلق له بس الحقيقة رفضت جدا خوف أن أحد ينحتن إذا بيعرف أني بحلق شعره ويالله أقنعته أن الكوافيره أحسن له

وبعدين وكل يوم وأنا راجع من الدوام يمكن ثلاثة أيام وزياد وعزام يقولون لي يبه شف الجهة ذي من الشعر طويل شوي قصره وهذا شكله ماهو زين عدله حتى طفشون وقلت ليتي ما حلقتهم إلى درجة أن زياد كان يروح للإختبارات وهو لابس شماغ عشان محد يشوف شكله وبالأخير عطاني أياه على بلاطة وقال لي يبه ترى المرة الثانية ما نبيك تحلقنا نبي الحلاق صباح التركي والصراحة حتى أنا تحسفت أني حلقتهم

توضيح أنا الحقيقة سويت السالفة اللي فوق لأني كنت مواعدهم أوديهم الحلاق بس أنشغلت وما قدرت أوديهم وأنزنقت بالوقت لأنهم كانوا رايحين لمشوار وقلت ما بدهاش يا ولد شغل المكينة والمقص وإدهر بروسهم والحمدلله أنه جت على كذا

بس بصراحة وش رايكم بالقصات ما أصلح حلاق

ملاحظة  فقط معن وريما فكهم الله من هالتجارب

بعد رحيل الشعر الأسود وقدوم الشعر الأبيض كضيف ثقيل لن يرحل إلا بعد ما يسقط غصبن عنه وتبدأ تطلع الصلعه الطبيعية اللامعة وبعد ما طلعت الكرشة نص متر قدام بس ماهو من كثر الدراهم لا بس من قل الحركة لأن الرجلين بعد تعبت وما عادت تركض مثل أول والحين جاء الدور على لؤلؤة الحياة الله يخلي لي ولكم لأآليكم وهي العيون 

الحقيقة من فترة وأنا ملاحظ أن النظر لك عليه خصوصا بالليل أو وقت السواقة ومستغرب لأني خابره سته على سته بس من زمان شوي وكان عندي نية أروح لطبيب عيون بس كل يوم ياحمد باكر حتى جاء وقت الفضاوة ومريت لي دكتور في المغربي وكشف وقالي الخبر المفاجيئ وهو أنه عندك قصر نظر يعني البعيد ما تشوفه زين بس تراه بسيط يمكن نص درجه بس قلت لعله خير لكن وش السبب يا دكتور أنا أخبر عيوني زي الفل وش اللي صار قال لي يمكن عشان بتقرأ كثير أو تقعد على الكمبيوتر واجد أو أو أو أو وعطان كل الأحتمالات اللي بالدنيا يمكن كلامه صحيح في بعض الحاجات بس الأكيد أن كان يجامل وما قال لي أن الكبر شين وما ورا ما بقى بالعمر قد ما مضى و خلاص يالله تحسن الخاتمة وميخالف نلبس نظارات وتصير العيون بدال ثنتين أربع

بس الصراحة أن الشوف ضبط ولله الحمد بعد النظارات

  بس كيف شكلي بالنظارات عساه حليل بس بدون مجاملات ولا تصير مثل سكرتير المكتب يقولي اليوم سير يو ار ناو مور هاندسم

 يعني أنك الحين صرت وسيم أكثر قلت له دفلج يا نصاب